Liewe Afrikaans #7

Kyk net hoe pragtig lyk jy vir jou ouderdom! So, hier staan jy – honderd jaar oud. Dis ʼn groot mylpaal vir ʼn taal wat met soveel liefde en deursettingsvermoë gebou is. Jy het ons al deur dik en dun gelei, en steeds bly jy ʼn stem van ons harte, ons kultuur, en ons herkoms.

Jy het deur die jare baie gesigte gesien – van klaskamers tot kombuistafels, van groot stories in boeke tot klein gesprekke tussen vriende. Jy’s deel van ons alledaagse lewe, ʼn deel van ons diepste gedagtes en ons mooiste drome. Jou woorde het ons laat lag, ons laat troos vind in tye van seer, en ons betekenis gegee aan die alledaagse dinge.

Jy het alles gesien, né? Van ons eerste kinderkrabbel op papier, tot groot name wat met jou in gedigte getoor het. Jy is soos ʼn ou, betroubare maat wat ons altyd verstaan. As ons jou in die oggend oor ʼn koppie koffie groet, en in die aand sê “lekker slaap,” is jy daar, maak nie saak wat nie.

Hier staan jy nou, met honderd kersies op jou koek. Laat ek jou sê – jy’s ʼn taal wat ons nog lank saam met ons wil hê. Ons kinders en kleinkinders gaan jou liefkry, soos ons, want jy’s ons storie, ons herinneringe en ons toekoms.

So, veels geluk, Afrikaans! Mag jy nog honderde jare lank sing, lag en droom in elkeen se harte.

Met baie liefde en ʼn groot drukkie,

Jou grootste bewonderaar

Emily Olivier

(Gr. 11)