Wen jou eksamens met dié wenresep

Foto: wix.com

Eksamen is vir baie van ons soms ʼn oorweldigende tydperk van stres en angs, maar met behulp van die regte tegnieke, kan jy tyd spaar en slimmer leer. Deur effektiewe studiemetodes te gebruik, vermy jy tydmors en onthou jy belangrike inligting makliker. Hier is vier maniere om jou leerproses te verbeter:

Gebruik aktiewe herroeping 

Moenie net jou notas oor en oor lees nie, vra jouself vrae oor die werk en probeer dit uit jou geheue oproep. Beantwoord oefenvraestelle sonder om na jou notas te kyk. Dr. Henry Roediger sê: “Toetse assesseer nie net wat ons weet nie, maar verander dit, wat latere behoud van informasie verbeter.”

Pas die Pomodoro-tegniek toe 

Studeer in siklusse van 25 minute met kort pouses van vyf minute tussenin. Ná vier sulke siklusse, neem jy ʼn langer pouse van 15 tot 30 minute. Dit help om jou brein vars te hou en verhoog jou produktiwiteit.

Maak visuele sketse 

Diagramme, breinkaarte en prentjies help om komplekse konsepte makliker te verstaan. Kleure en patrone maak dit makliker om inligting vinniger te onthou.

Verduidelik dit aan iemand anders 

As jy iets in jou eie woorde aan ʼn vriend of familielid kan verduidelik, bewys dit dat jy die werk regtig verstaan. Hierdie tegniek help om gapings in jou kennis te identifiseer en te verbeter.

Gebruik hierdie tegnieke om slimmer en doeltreffender te leer. Met goeie voorbereiding kan jy jou eksamen met selfvertroue aanpak en groot sukses vanjaar behaal!